العيب

الضايعه تـــبدأ مــن القـــيل والقــال= لـو كان ما للخلق عندك مطــاليب
دنياك لـو تغري مــقامك بالاقـــبال= عن وجهها جــوّد لكفك مقاضــيب
اقضب عنان العقل عن كل مختال= ولا توقف ما قف الشك والريـــــب
كم هرجةٍ يفرط بها حرص عذال= تظهر فوات الحرص عند الاجانيب
ويركب ظهرها كل مبغض وختال= ويسـوقها سـوق العــرب للمناجــيب
الناس دون احساس ماترحم الزال= إلا علـــــيه يوثقــــــون التعاجيــــب
مشاكل أيـامك عريضـات وطوال= تفرق بهـا خبــث الـنوايا مـن الطيب
هذا وحظــي طول الايام ما مــال= راسي رفيــع ٍ عــند سَــال ومجيـــب
حنيفي ٍ بالفعل من حومة ابطــال= حقــي مـن الـتاريخ بـــيض المكاتيب
من فضل رب ٍ بالخفا يعلم الحال =نـارد علــى عسـر المـوارد لياهيــب
ياللي تحَسْب العز في كثرة المال =فقـد الجمالــه والــتجمل هــو العيــب
العود لو هو ميـت ٍ جالــه ظـلال =جالـه ظلال ٍ عــن ســموم اللواهيـــب
المال مثل الفيّ في كـل الاحوال =حـظ مـن اللــي يعلــم الســر والغيــب
من لا يموت الحظ به مات ماطال =ولا غـــنم يــوم الســعد بالمواجيـــب
الدين عز ورايته طيب الاعمــال =وفزعة خفا علــي الــنقا للأصــاحيب
وثّق كلامك فــالمواقف بالافعــال =ولا تطـاول مـن علــى حـق ومصيب
اصبر على الميلات والرب حلاّل = الصــبر مفــتاح ٍ لصــاف المشــاريب
الصبر مفتاح الفرج مابـه اشــكال= يــرقا بــه الــرجّال روس المراقيـــب
هذا وانــا بَوْصــيك بمــبادر الفال= الفــال يــا رجّــال مــا يلطمــه ذيــب