نصيحة - الغزل والوجدان

من لا رفع لك بالملاقا ذراعه=نَزَّهْ يمينك عن ملامس يمينه
لا صار باعك خمسة أبواع باعه= خلّه يوفي بالمقاييس دينه
سنبوق ينشر وسط بحرك شراعه= وموج البحر لاهاج غرّقْ سفينه
وش وهّقَهْ يعرض رخيص البضاعه= في سوق غالي والفوارق ثمينه
من لا يعزَّكْ لوك تغليه باعه=مبداك والنفس العزيزه حصينه
من لا رضخ لك ليش تعطيه طاعه=وتحط نفسك في يمينه رهينه
خذها نصيحة من مجرَّب وداعه= اللَّي يعينك تنهزع لا تعينه
واحفظ لنفسك عزتك والمناعه= واضحك ولو إن المشاعر حزينه