غمضة - الغزل والوجدان

طيفك معي ما فارق العين لحظه

وصمت السوالف بين روحك وبيني

قدام عيني عند نومٍ ويقظه

يديك ما تطلق مقاضب يديني

عيني تشوفك بين غمضة وغمضه

فضفض وسولف بالعتب يا ضنيني

وإن جاك طيفي يطلب رضاك فرضه

عطه الغلا واترك سبيله يجيني

وليلك بروحي كلما تبعد اقضه

أبيك لا ونيت تسمع ونيني

كل النهار أناظرك فيه ومضه

نورك ملأ يا فارع الجيد عيني

اسمٍ حفرته في سما الخافق أمضه

ما عاد أبي خلٍ بدالك يبيني

ناظرني بطرفٍ خذا القلب واغضه

تزهر وتثمر بالمحبة سنيني

بعض المحبة والهوى رمي عرضه

الرمي واجد والملا سالميني

وأنا أجتلد كني على جمر حمضه

بالليل أصفق في شمالي يميني