الشاعر ساري والسامر

قالوا مخاوي قلت يا ناس تأكيد

أنا خويّه بالشرف والشهامه

له الغلا ياسعود مافيه تحديد

يالعاذل المسكين عقل النعامه

مانيب من يسمع كثير التهاديد

لاتهدد اللي مايغير حزامه

لوطالت الأيام تعطيه تجديد

عندي ولايلحق حزامي ملامه

تصدر أوامر مالها شرط أو قيد

شورك عمى ومفارقتك السلامه

أنا أعرف النمام محذور وبعيد

عن كل رجل ماتزعرع عظامه

نعم الصديق اللي تحدى هل الكيد

مايستمع للي كثير كلامه

ناسٍ تجيب القول من زيد وعبيد

يسعون طول أعمارهم بالنمامه

أخوان حنا لا خويٍّ ولاسيد

نمشي على درب الوفاء والكرامه

طير بلاجنحان لويطلب الصيد

مايرتفع لو كان قويت عظامه

ولايستوي بنيان من دون تشييد

يطيح لاهلّت عليه الغمامه